نهى سكر

 
السلام عليكم ورحمة الله وبركاته
في صفحتي حاعلمك كيف ممكن تسوي كتير أشياء بنفسك
لهدفين اللي هما التسلية والاستفادة بإذن لله
DIY Special occasions
_________________________________________________

لقيت طريقة حلوة لكورة الضغط او بس مجرد كورة مطاطية (stretchy ball)
فكرتها انها ملونة وحلوة وبسيطة وتقدري تعمليها بنفسك

الأشياء اللي نحتاجها هي:

1- دي كور صغيرة لو حطيناها في موية تكبر اسمها اوربيز Orbeez (تاخد ساعة في الموية تقريبا عشان تكبر)
 

2- بلونة شفافة
3- قارورة فيها شوية موية (الربع تقريبا)


كيف تعمليها:

1- اول شي نفرغ الاوربيز في القارورة (ونستناها ساعة تقريباً عشان تكبر)

2- ننفخ البلونة شوية على حسب كمية الاوربيز وكمان على حسب حجم الكورة اللي نبغاها  (قد حجم الكف تقريبا)

3- نحط فتحة البلونة المنفوخة على فتحة القارورة بشويش عشان لا يخرج الهوا من البلونة

4-  نفرغ الاوربيز جوا البلونة

5- نربط البلونة


وبكدا حيكون دا الشكل النهائي للكورة


 
 
انا عملتها بس عبيتها موية كمان ولعبنا بيها في حفلة المسبح
ان شاءالله عجبتكم الفكرة
اشوفكم مع افكار تانية ان شاءالله
 
 
_________________________________________________________________________



لما يكون عندنا حفلة غالباً بنستعمل ملاعق وشوك بلاستيك .. طيب ما طفشتوا من شكلها التقليدي؟
جبتلكم فكرة مرة حلوة وما حتاخد وقت وسهلة كمان

حتحتاجي للطريقة الأولى:

1- الملاعق والشوك (يفضل تكون شفافة)



2- لصق ملون (على حسب لون الثيم حق الحفلة)


الطريقة مرة بسيطة بس تقصي اللصق وتلصقيه على الملعقة و الشوكة

 
كدا حيكون شكلها النهائي
 
 
 

 
طيب دحين اوريكم الطريقة التانية اللي حتحتاجي فيها:

1- ملاعق وشوك (اللون على حسب الثيم حق الحفلة)


 
2- لصق (ما يهم اللون)

 
3- غراء سائل و فرشاة 
 
 
4- اكليل (لميع)
 
 



طريقة التنفيذ:

1- حطي اللصق في نص الملعقة للتحكم وادهني الملعقة بالغراء السائل باستعمال الفرشاة

 
 
2- رشي الاكليل فوق الغراء
 
 
 
3- استنيه ينشف وبعدين شيلي اللصقة
 
 
وبعدين ممكن تحطيهم في كاسة عشان شكلها احلى وهي واقفة
 
 
 
في وقت بسيط قدرتي تعملي إضافة مميزة على حفلتك 
 
وان شاءالله عجبتكم الفكرة 





_____________________________________________________________________________


نكمل على موضوع الحفلة .. في فكرة صغيييييرة
كيف ممكن نعطي البلونات شكل مختلف عن المعتاد؟
الجواب هنا
حتحتاجي الى:

1- بلونات (اللون على حسب الثيم حق الحفلة)


 
 
2- ورق لاصق على شكل دائرة (ابيض اللون او حسب اللون اللي تبغيه)
 
 



3- قلم عشان تلوني الورق الدائري (ممكن تتخلي عنو ازا الورق الدائري كان لونو حسب رغبتك)




يلا نبدأ التنفيذ:

حتنفخي البلونات و تلوني الورق الدائري (لو ما كان ملون) وممكن تخليه ابيض وبعدين تلصقيه على البلونات




وبكدا سار عندك بلونات منقطة




ان شاءالله عحبتكم الفكرة
وازا عندكم مناسبات ومحتارين ايش تسووا ممكن تكتبولي تعليق وانا باذن لله اشوفلكم أشياء حلوة


___________________________________________________________________________

احلى شي في الحفلة هو الاكل
خليني اوريكم طريقة ممكن تقدمي بيها الشوكولاتة

ايش حتحتاجي وكيف حتسويها:

1- ملاعق بلاستيك (اللون على حسب الثيم حق الحفلة) وكتاب عشان يخلي الملاعق ثابتة




2- شوكولاتة (حسب النوع المفضل ليكي) وتسيحيها وتصبيها على الملاعق



3- حلاوة رش Sprinkles (اختياري) وترشيها على الشوكولاتة اللي على الملعقة

 
 

ان شاء الله عجبتكم الفكرة



وبالعااااااااافية


____________________________________________________________________________



ازا كان عندكم حفلة مسبح وتبغوا الأغراض تكون قريبة منكم وما فيكم حيل تجيبوها
من برا المسبح

دا احسن حل ليكم:


حتحتاجي الى:

1- صندوق بلاستيك
2- حبل نحيف
3- اسفنجات حقت المسبح (تلاقيها مع أغراض المسبح زي العوامات وغيرها وتستعمل
للطفو على الموية)


يلا نبدأ التنفيذ:

حتحددي طول الاسفنج على حسب طول العلبة و بعدين تدخلي الخيط على الأربعة
الاسفنجات (هي تكون فيها فتحة من النص أساسا) وتربطيها بقوووة وتقصي الخيط
الزايد



 
 وبس سار عندكم حامل للأغراض او المشروبات
ان شاءالله عجبتكم الفكرة
واكتبولي رأيكم

____________________________________________________________________________


نهاية السنة قربت تقريباً واكيد عندكم خريجين تبغوا تهدوهم هدية
فـ انا لقيتلكم فكرة حلوة عشان تحطوا فيها هديتكم


الأشياء اللي حتحتاجيها:

1- العلبة (الحجم اللي تبغيه)
2- ورق اسود مقوى (ممكن يكون يلمع حسب الاختيار)
3- غراء مسدس
3- لصق نحيف (يكون من الجهتين)
4- مقص
5- ازرار اسود
6- خيط اصفر او ذهبي
7- استكرات (ملصقات) على شكل حروف (اختياري)



يلا نبدأ:

1- تقيسي ارتفاع العلبة وتقصي الورق المقوى على نفس الارتفاع وتلصقيه باللصق من جميع الاتجاهات




2- تقصي قطعة مربعة اكبر من الغطاء حقت العلبة (تكرريها من الجهتين عشان الورقة من تحت لا تبان بيضاء) وتغريها على الغطاء بالغراء المسدس




3- الخيط الأصفر تسويه زي كدا (تقصيه حوالي 5 سم وتربطيه) وتغري الازرار في نص الغطاء بالزبط وتربطي الخيط الأصفر حول الازرار


 
 
 

4- الخطوة الأخيرة اختيارية اللي هي الحروف (الاستكرات) و طبعاً ليكي حرية اختيار العبارة

 

 

ودا هو الشكل النهائي للعلبة




 والف مبروووووك لكل الخريجين والخريجات والله يجعلني انا وصحباتي منهم قريب ان شاءالله
و أتمنى عجبتكم الفكرة
و حاجيكم بفكرة احلى المرة الجاية ان شاءالله


_____________________________________________________________________________



كلنا نحب نكون مميزين بين الناس وخاصة فالمدرسة
لقيت فيديو مرة حلو .. فيه طرق كيف تزيني دفاتر واقلام وشنطة المدرسة
يلا نتفرجوا
ملاحظة: الفيديو فيه موسيقى

 
 
 
ازا حبيتوا الفيديو حقها ممكن تزوروا قناتها على اليوتيوب MayBaby Channel

 و ان شاءالله استفدتوا
واشوفكم مع أفكار تانية بإذن لله قريباً
 
____________________________________________________________________________
 
 
جبتلكم فكرة للمدرسة .. طبعا اكيد كلنا نسوي مطويات للمدرسة
وكتير ابلات كانوا يقولولي نبغا ابداع
فـ شوفوا الفكرة دي من خلال الرابط وان شاءالله تفيدكم
 
 
 
 اشوفكم مع أفكار تانية ان شاءالله
 
____________________________________________________________________________
 
 
لو تبغي تهدي صحبتك هدية بسيطة وتكون غير عن كل الهداية
لقيت فكرة مرررة حلوة وبسيطة
طبعا كل بنت تحب تكون شفايفها مرطبة ومو ناشفة وكلنا نحط مرطب
ف شوفوا دي الفكرة والفيديو بسيط ومارح يحتاج شرح باذن لله
 
 
 



هناك 6 تعليقات:

  1. أفكارك جميلةو رائعة للأمام

    ردحذف
  2. الله يعطيكي العافيه مره جميله افكارك ��

    ردحذف
  3. ابداعك بالأفكار جداً جميل

    ردحذف
  4. ابداعتي بأفكارك استمري

    ردحذف
  5. شكرا على الافكار المفيدة استمري

    ردحذف
  6. الله مره جميل ومفيد شكرًا على الافكار .

    ردحذف

نرحب بتعليقاتكم الهادفة